,,മദ്യലഹരിയില്‍ അപകടം; ആശുപത്രിയില്‍ എത്തിച്ച ഇരട്ട സഹോദരങ്ങളായ സൈനികര്‍ പൊലീസിനെയും ജീവനക്കാരെയും മര്‍ദിച്ചു,

 ഹരിപ്പാട് മദ്യപിച്ച്‌ വാഹനമോടിച്ച്‌ അപകടം ഉണ്ടാക്കിയ സഹോദരങ്ങളായ സൈനികർ പൊലീസിനെയും ആശുപത്രി ജീവനക്കാരെയും മർദിച്ചു.

ഹരിപ്പാട് ചിങ്ങോലി സ്വദേശികളും ഇരട്ടകളുമായ അനന്തൻ, ജയന്തൻ എന്നിവരാണ് പൊലീസിനെയും ആശുപത്രി ജീവനക്കാരെയും ആക്രമിച്ചത്.

ഇന്നലെ രാത്രി 11 മണിയോടെയായിരുന്നു സംഭവം.നങ്ങ്യാർകുളങ്ങര കവലയ്ക്ക് സമീപം ഡിവൈഡറില്‍ ഇവരുടെ കാർ ഇടിച്ച്‌ അപകടം ഉണ്ടായി.ഹരിപ്പാട് താലൂക്ക് ആശുപത്രിയില്‍ എത്തിച്ചപ്പോഴാണ് പൊലീസിനെയും ജീവനക്കാരെയും ആക്രമിച്ചത്.

ഇരുവരും മദ്യലഹരിയില്‍ ആയിരുന്നു. ആക്രമണത്തില്‍ ആശുപത്രിയുടെ വാതില്‍ തകർന്നു.നാട്ടുകാരും പൊലീസും ചേർന്ന് ബലം പ്രയോഗിച്ചാണ് ഇവരെ പൊലീസ് സ്റ്റേഷനില്‍ എത്തിച്ചത്.