തണ്ണീർ കൊമ്പൻ ദൗത്യം വിജയകരമെന്ന് റിപ്പോർട്ട്

വയനാട്: തണ്ണീർക്കൊമ്പൻ ദൗത്യം വിജയകരമെന്ന് റിപ്പോർട്ട്. തണ്ണീർക്കൊമ്പനെ ലോറിക്കുളളിൽ കയറ്റി എന്നാണ് പുറത്തു വരുന്ന വിവരം.

10 മണിയോടെയാണ് കുങ്കിയാനകളുടെ സഹായത്തോടെ ആനയെ എലിഫന്റ് ആംബുലൻസിലേക്ക് കയറ്റിയത്. കർണാടകയിലെ രാമപുരത്തെ ക്യാമ്പിലേക്ക് ആണ് ആനയെ കൊണ്ടു പോകുന്നത് എന്നാണ് ലഭിക്കുന്ന വിവരം.

20 വയസിന് താഴെ പ്രായമുള്ള കൊമ്പനാന കര്‍ണാടക വനമേഖലയില്‍ നിന്നുമാണ് വയനാട്ടിലെത്തിയത്. ഹാസൻ ഡിവിഷന് കീഴില്‍ ഇക്കഴിഞ്ഞ ജനുവരി 16ന് മയക്കുവെടിവെച്ച് പിടികൂടി റേഡിയോ കോളര്‍ ഘടിപ്പിച്ച് കാട്ടില്‍ വിട്ടിരുന്നതാണ്.

എന്നാൽ പതിവായി കാപ്പിത്തോട്ടങ്ങളിലിറങ്ങി ഭീതി പരത്തിയിരുന്ന കാട്ടാന ഇതുവരെയും ആരെയും ഉപദ്രവിച്ചതായി റിപ്പോർട്ടുകൾ ഇല്ല. 

അതേസമയം ഇപ്പോൾ ആനയുടെ ഇടത് കാലിന്‍റെ ഒരു ഭാഗത്തായി വീക്കം കാണാനുണ്ട്. അതിനാൽ ആന ക്യാമ്പിലെത്തി രണ്ട് ദിവസം വിദഗ്ധ ചികിത്സ നൽകാനാണ് തീരുമാനം.

വെറ്ററിനറി സർജൻമാരെത്തി ആനയെ വിശദമായി പരിശോധിക്കുമെന്നും ഫീൽഡ് ഡയറക്ടർ വ്യക്തമാക്കിയിട്ടുണ്ട്.

ആനയുടെ ആരോഗ്യം തൃപ്തികരമാണെന്ന് ഉറപ്പ് വരുത്തിയ ശേഷം ആനയെ കാട്ടിലേക്ക് തുറന്നുവിടുമെന്നും അധികൃതർ അറിയിച്ചു.