സീറോ മലബാർ സിനഡിന്റെ സർക്കുലറുകൾ വായിക്കാത്തത് കടുത്ത സഭാ നിയമ ലംഘനം:വൈദികർക്കെതിരെ ശിക്ഷാ നടപടികൾ വേണം/ സീറോ മലബാർസഭാ അൽമായ ഫോറം

എറണാകുളം :സീറോ മലബാർ സിനഡ് മെത്രാന്മാരുടെ സംയുക്ത സർക്കുലർ എറണാകുളം അങ്കമാലി അതിരൂപതയിലെ ഇടവകകളിൽ വായിക്കാത്തത് വിശ്വാസികളുടെ അവകാശങ്ങളിൽ മേലുള്ള കടന്നുകയറ്റമാണെന്ന് സീറോ മലബാർസഭാ അൽമായ ഫോറം.

വിശുദ്ധ കുർബാന അർപ്പിക്കുന്ന പല അതിരൂപതാ സ്ഥാപനങ്ങളിലും കോൺവെന്റുകളിലും സർക്കുലർ വായിച്ചില്ല എന്നത് സഭയുടെ നിയമങ്ങൾക്കെതിരെയുള്ള കടുത്ത ലംഘനമാണ്.

സഭയും ആരാധനക്രമവും അനുശാസിക്കുന്ന  ഏകീകൃത രീതിയിൽ ആയിരിക്കണം കുർബാന എന്ന നിയമവും ചില വൈദികർ ലംഘിക്കുകയാണ്. വിശ്വാസികളുടെ മേലുള്ള ഇത്തരം രീതിയിലുള്ള മാടമ്പി വൈദിക മേധാവിത്വം അംഗീകരിക്കില്ല.

സഭയുടെ തലവൻ നൽകുന്ന സർക്കുലറുകൾ വായിക്കാൻ ധാർമികമായി വൈദികർ കടപ്പെട്ടവരാണ്.സഭയിലെ വിശ്വാസികളെ തെറ്റിദ്ധരിപ്പിക്കാനുള്ള എറണാകുളം അങ്കമാലി അതിരൂപതയിലെ  ചില വൈദികരുടെ നിഗൂഢ ശ്രമങ്ങളെ കഠിനമായി അപലപിക്കുന്നു.

സമൂഹത്തിന്റെ മാതൃകകളും വിശ്വാസ കൂട്ടായ്മയുടെ യഥാർത്ഥ ഗുരുക്കന്മാരും ആയിരിക്കേണ്ട ചിലർ, പ്രത്യേകിച്ച് വൈദികർ, സിനഡിന്റെ തീരുമാനങ്ങളെ അനുസരിക്കാതിരിക്കുന്നതും എതിർക്കുന്നതും കടുത്ത നിയമ ലംഘനമാണ്.