" പകൽ സമയത്തും മൂന്നാറിൽ കടുവയുടെ സഞ്ചാരം " ആശങ്കയൊഴിയാതെ മൂന്നാർ നിവാസികൾ.

ഇടുക്കി :മൂന്നാർ തേയിലത്തോട്ടത്തിൽ പകൽ സമയത്ത് കടുവയിറങ്ങി. കല്ലാർ ഫാക്ടറി ഡിവിഷനിൽ 8-ാം നമ്പർ ഫീൽഡിലാണ് ഇന്നലെ രാവിലെ 8.15ന് തൊഴിലാളികൾ കടുവയെ കണ്ടത്.

തൊഴിലാളികൾ കൊളുന്ത് എടുത്തുകൊണ്ടിരുന്ന സമയത്താണ് എതിർ ഭാഗത്തുള്ള റോഡിലൂടെ കടുവ നടന്നു കാട്ടിലേക്ക് പോയത്. ആറു മാസം മുൻപ് എസ്റ്റേറ്റിൽ തൊഴിലാളികൾ കടുവയെ കണ്ടിരുന്നു.

മേഖലയിൽ കഴിഞ്ഞ ഏതാനും മാസങ്ങളായി കടുവയെ കൂടാതെ കാട്ടുപോത്ത്, കാട്ടാനകൾ എന്നിവയുടെ ശല്യവും കൂടുതലാണ്.

സ്കൂൾ വിദ്യാർത്ഥികളും സ്ത്രീകളും തൊഴിലാളികളും വീണ്ടും കടുവയെ കണ്ട സാഹചര്യത്തിൽ ഭീതിയിലാണ് വനം വകുപ്പിന്റെ ഭാഗത്തുനിന്നും നടപടി വൈകുന്നതിന്റെ ആശങ്കയും പ്രദേശ വാസികൾ പങ്കുവെച്ചു.