പ്രത്യേക സഹായധന പദ്ധതി: യുപിക്ക് കേന്ദ്ര ലോട്ടറി, ഏറ്റവുംകുറവ് തുക കിട്ടിയ സംസ്ഥാനങ്ങളില്‍ കേരളം,,

ഡല്‍ഹി: കോവിഡ് അടച്ചിടല്‍സമയത്ത് കേന്ദ്രം പ്രഖ്യാപിച്ച പ്രത്യേക സഹായധനപദ്ധതിയില്‍ നാലുവര്‍ഷവും ഏറ്റവുമധികം തുക നേടിയെടുത്ത സംസ്ഥാനം ഉത്തര്‍പ്രദേശാണെന്ന് കേന്ദ്രം പുറത്തുവിട്ട കണക്കുകള്‍ വ്യക്തമാക്കുന്നു.കേന്ദ്രം നിര്‍ദേശിച്ച ബ്രാൻഡിങ് നടപ്പാക്കാത്തതിനാല്‍ ഈ സാമ്പത്തികവര്‍ഷം കേരളത്തിന് നയാപൈസ കിട്ടിയില്ലെന്ന് കഴിഞ്ഞദിവസം 'മാധ്യമങ്ങൾ റിപ്പോര്‍ട്ടുചെയ്തിരുന്നു. ആന്ധ്രാപ്രദേശ്, മണിപ്പുര്‍, പഞ്ചാബ് എന്നിവയ്ക്കും പണം കിട്ടിയില്ല.

ഇക്കാലയളവില്‍ അനുവദിച്ച 1,67,518.6 കോടിയില്‍ 22,857.9 കോടിയും നേടിയത് യു.പി.യാണ്. മൊത്തം തുകയുടെ 14 ശതമാനമാണിത്. ഈ സാമ്പത്തികവര്‍ഷം യു.പി.ക്കായി അനുവദിച്ച 18,936 കോടിയില്‍ ഇതിനകം 12458.43 കോടിയും യു.പി. സര്‍ക്കാര്‍ നേടിയെടുത്ത് ചെലവിട്ടു. 2020-'21-ലാണ് പദ്ധതി നടപ്പാക്കിയത്.

തുക നേടിയെടുത്ത സംസ്ഥാനങ്ങളില്‍ യു.പി. കഴിഞ്ഞാല്‍ തൊട്ടടുത്ത് ബിഹാറാണ്. നാലുവര്‍ഷത്തിനിടയില്‍ ഏറ്റവുംകുറവ് തുക കിട്ടിയിരിക്കുന്ന സംസ്ഥാനങ്ങളുടെ കൂട്ടത്തിലാണ് കേരളം. ഈ വര്‍ഷമാകട്ടെ ഒന്നുംകിട്ടിയുമില്ല.

നാലുവര്‍ഷ വിഹിതം ഇങ്ങനെ

5000 കോടിവരെമാത്രം കിട്ടിയവ: കേരളം, പഞ്ചാബ്, ചണ്ഡീഗഢ്, ഹിമാചല്‍പ്രദേശ്, ഉത്തരാഖണ്ഡ്, മേഘാലയ, മണിപ്പുര്‍, മിസോറം, ത്രിപുര, സിക്കിം, അരുണാചല്‍പ്രദേശ്, നാഗാലാൻഡ്, ഗോവ, തെലങ്കാന.

* 5000-10,000 കോടി: ആന്ധ്രാപ്രദേശ്, തമിഴ്നാട്, കര്‍ണാടക, ഗുജറാത്ത്, ഒഡിഷ, ഝാര്‍ഖണ്ഡ്, ഛത്തീസ്ഗഢ്, അസം

 10,000-15,000 കോടി: പശ്ചിമബംഗാള്‍, മഹാരാഷ്ട്ര, രാജസ്ഥാൻ

15,000 കോടിക്ക് മുകളില്‍: യു.പി. (22,857.9 കോടി), മധ്യപ്രദേശ്, ബിഹാര്‍ (16,680.9 കോടി)

വര്‍ഷം അനുവദിച്ച തുക (കോടിയില്‍)

2020-21 11,830.29

2021-22 14,185.78

2022-23 81,195.35

2023-24 60,307.19 (ഡിസംബര്‍ 13 വരെ നല്‍കിയത്)