ചെന്നൈ നഗരം പ്രളയ സമാനമായ സാഹചര്യത്തിൽ' റോഡ് മുറിച്ചു കടന്ന് ഭീമൻ മുതലയും'

ചെന്നൈ: കനത്ത മഴയെ തുടർന്ന് വെള്ളക്കെട്ട് രൂപപ്പെട്ട ചെന്നൈയിൽ റോഡിൽ മുതല ഇറങ്ങിയതായി റിപ്പോർട്ട്.

നേർക്കുൻട്രം വിഐടിക്ക് സമീപമാണ് മുതലയെ കണ്ടത്. ഇതിന്റെ വീഡിയോയും ചിത്രവും സമൂഹ മാധ്യമങ്ങളിൽ പ്രചരിക്കുന്നുണ്ട്. മുതല റോഡിന്റെ ഒരു വശത്ത് നിന്ന് മറുവശത്തേക്ക് പോകുന്നതാണ് വീഡിയോയിലുള്ളത്. കാറിൽ നിന്ന് ആരോ പകർത്തിയ ദൃശ്യമാണിത്.

മിഷോങ് ചുഴലിക്കാറ്റ് ചൊവ്വാഴ്ച തീരം തൊടാനിരിക്കെ അതിശക്തമായ മഴയാണ് ചെന്നൈയിൽ തുടരുന്നത്. വടപളനി, താംബരം അടക്കം മിക്കയിടങ്ങളിലെ വീടുകളിലും വെള്ളം കയറി.

നെടുങ്കൻട്രം നദി കരകവിഞ്ഞു. സബ് വേകളും അടിപ്പാലങ്ങളും വെള്ളത്തിൽ മുങ്ങി. ചെന്നൈ അടക്കം ആറ് ജില്ലകളിൽ ഇന്ന് പൊതു അവധി പ്രഖ്യാപിച്ചിട്ടുണ്ട്.

കേരളത്തിലേക്ക് അടക്കമുള്ള മുപ്പത്തിലധികം ട്രെയിൻ സർവീസ് റദാക്കിയതായും സർക്കാർ വൃത്തങ്ങൾ അറിയിച്ചു. റൺവെയിൽ വെള്ളക്കെട്ട് രൂപപ്പെട്ടതിനെ തുടർന്ന് ഇരുപത്തൊൻപത് വിമാനങ്ങളും വൈകുമെന്ന് സർക്കാർ അറിയിച്ചു.