''ഈ സർക്കാരിനെ നമ്പാൻ കൊള്ളത്തില്ല'' മൺചട്ടിയുമായി ഭിക്ഷയാചിച്ച് പ്രതിഷേധിച്ച മറിയക്കുട്ടിയെ കാണാൻ നടനും മുൻ എംപിയുമായ സുരേഷ് ഗോപി എത്തി

ഇടുക്കി: ക്ഷേമ പെൻഷൻ ലഭിക്കാത്തതിന് മൺചട്ടിയുമായി ഭിക്ഷയാചിച്ച് പ്രതിഷേധിച്ച മറിയക്കുട്ടിയെ കാണാൻ നടനും മുൻ എംപിയുമായ സുരേഷ് ഗോപി എത്തി. മറിയക്കുട്ടിയുടെ 200 ഏക്കറിലെ വീട്ടിലാണ് സുരേഷ് ഗോപിയെത്തിയത്. പ്രാദേശിക ബി ജെ പി നേതാക്കളും അദ്ദേഹത്തിനൊപ്പമുണ്ടായിരുന്നു.

'പെട്രോൾ അടിക്കുമ്പോൾ രണ്ട് രൂപ അധികം പിരിക്കുന്നു. മുഖ്യമന്ത്രി തന്നെ കഴിഞ്ഞ ദിവസം പറഞ്ഞിരിക്കുന്നത് ഇത് പാവങ്ങൾക്കുള്ള ക്ഷേമ പെൻഷനും, വിധവാ പെൻഷനുമൊക്കെയുള്ളതാണെന്നാണ്. ഈ സർക്കാരിനെ നമ്പാൻ കൊള്ളത്തില്ല.'- എന്നാണ് സുരേഷ് ഗോപി മറിയക്കുട്ടിയോട് പറയുന്നത്.

മറിയക്കുട്ടി സർക്കാരിനെ വിമർശിക്കുന്നതിനിടെ, 'നിങ്ങൾ ഇതൊക്കെ സെൻസർ ചെയ്‌തേ കൊടുക്കാവൂ, കാരണം അമ്മയ്ക്ക് വേറെ കുഴപ്പങ്ങളൊന്നും ഉണ്ടാകരുത്. നിങ്ങൾക്ക് അവരെയൊക്കെ നന്നായിട്ടറിയാം. ശ്രദ്ധിച്ച് കൊടുക്കണം.'- എന്ന് സുരേഷ് ഗോപി പറഞ്ഞു.