പാരിപ്പള്ളിയില്‍ ലഹരിമാഫിയ പിടിമുറുക്കുന്നു:പരസ്യ മദ്യപാനവും പതിവാണെന്ന് പ്രദേശവാസികള്‍,

ചാത്തന്നൂര്‍: പാരിപ്പള്ളിയില്‍ ലഹരി മാഫിയയും മദ്യപസംഘങ്ങളും സജീവമായിട്ടും പൊലീസ് ഇടപെടല്‍ കാര്യക്ഷമമല്ലെന്ന് ആക്ഷേപം.

എം.ഡി.എം.എ അടക്കമുള്ള ലഹരി വസ്തുക്കള്‍, കഞ്ചാവ് എന്നിവ വ്യാപകമായി ഉപയോഗിക്കപ്പെടുന്നു. ലഹരി കച്ചവടക്കാര്‍ ലോഡ്ജുകളിലും മെഡിക്കല്‍ കോളജ് പരിസരത്തും തങ്ങുകയാണെന്നാണ് ആക്ഷേപം. പാരിപ്പള്ളിയിലെ വിവിധ മേഖലകളില്‍ പരസ്യ മദ്യപാനവും പതിവാണെന്ന് പ്രദേശവാസികള്‍ പറയുന്നു.

പകല്‍ സമയങ്ങളില്‍ പോലും സ്ത്രീകള്‍ക്കും കുട്ടികള്‍ക്കും പുറത്തിറങ്ങിനടക്കുവാൻ കഴിയാത്ത അവസ്ഥ പലയിടത്തുമുണ്ട്. സ്ഥിരമായി മദ്യവില്‍പന നടത്തുന്ന സംഘം മെഡിക്കല്‍ കോളജും പരിസരവും കൈയടക്കിയ നിലയിലാണ്. പാരിപ്പള്ളി ടൗണില്‍ മാത്രം സ്ഥിരമായി ഇരുപതോളം മദ്യ കച്ചവടക്കാരും പത്തോളം കഞ്ചാവ് മയക്കുമരുന്ന് കച്ചവടക്കാരും ഉണ്ടെന്ന് പൊലീസും എക്സൈസും സമ്മതിക്കുന്നു.

ലഹരി വിപണനവും പരസ്യ മദ്യപാനവും നിയന്ത്രിക്കുവാൻ പൊലീസും എക്സൈസും കാര്യക്ഷമമായി നടപടി സ്വീകരിക്കണമെന്ന പ്രദേശവാസികളുടെ ആവശ്യം ശക്തമാണ്.