വിഴിഞ്ഞം രാജ്യാന്തര തുറമുഖത്തേക്കുള്ള ക്രെയിനുകളുമായി ചൈനയിൽ നിന്നു പുറപ്പെട്ട ഷെൻഹുവാ 15 എന്ന കപ്പൽ തെക്കൻ ചൈനയിലെ ഷിനയിൽ എത്തി.

തിരുവനന്തപുരം: വിഴിഞ്ഞം രാജ്യാന്തര തുറമുഖത്തേക്കുള്ള ക്രെയിനുകളുമായി ചൈനയിൽ നിന്നു പുറപ്പെട്ട ഷെൻഹുവാ 15 എന്ന കപ്പൽ തെക്കൻ ചൈനയിലെ ഷിനയിൽ എത്തി.

കപ്പലിലുള്ള 3 വലിയ ക്രെയിനുകളിൽ രണ്ടെണ്ണം ഗുജറാത്ത് മുന്ദ്ര തുറമുഖത്ത് ഇറക്കിയ ശേഷം കപ്പൽ വിഴിഞ്ഞത്ത് എത്തുന്നത് ഈ മാസാവസാനത്തോടെ. തുറമുഖത്തിന്റെ ആദ്യ ഘട്ട പൂർത്തീകരണവുമായി ബന്ധപ്പെട്ട് എത്തുന്ന കപ്പലിനെ സ്വീകരിക്കാനുള്ള ചടങ്ങ് വലിയ ആഘോഷമാക്കാനുള്ള അണിയറ ഒരുക്കത്തിൽ അധികൃതർ.

മുഖ്യമന്ത്രി, കേന്ദ്ര ഷിപ്പിങ് മന്ത്രി എന്നിവരുൾപ്പെടെ പങ്കെടുക്കുന്ന വിപുലമായ ചടങ്ങാക്കി മാറ്റാനുള്ള ചർച്ചകൾ പുരോഗതിയിലാണ്. ഈ മാസം 30ന് അകം കപ്പൽ വിഴിഞ്ഞത്ത് എത്തുമെന്നാണ് അധികൃതരുടെ വിശദീകരണം. മന്ത്രിമാരുടെ സമയ ലഭ്യതയനുസരിച്ചാവും ഉദ്ഘാടന ചടങ്ങ് ക്രമീകരിക്കുക.

ആദ്യ കപ്പൽ അടുക്കുന്നതിന് 270 മീറ്റർ നീളത്തിനുള്ള ബെർത്താണ് സജ്ജമാക്കുന്നതെന്ന് അധികൃതർ പറഞ്ഞു. ഇതനുസരിച്ചുള്ള യാർഡും സജ്ജമാക്കുകയാണ്.