കേന്ദ്രമന്ത്രിയുടെ വീട്ടിൽ യുവാവിനെ വെടിയേറ്റ് മരിച്ച നിലയിൽ കണ്ടെത്തി.

ദില്ലി: കേന്ദ്രമന്ത്രിയുടെ വീട്ടിൽ യുവാവിനെ വെടിയേറ്റ് മരിച്ച നിലയിൽ കണ്ടെത്തി. മന്ത്രിയുടെ മകന്റെ സുഹൃത്തായ വിനയ് ശ്രീവാസ്തവയാണ് കൊല്ലപ്പെട്ടത്.

കേന്ദ്രമന്ത്രി കൗശൽ കിഷോറിന്റെ ലക്നൗവിലെ വസതിയിലാണ് സംഭവം. അതേസമയം, സംഭവത്തിൽ പ്രതികരണവുമായി കേന്ദ്രമന്ത്രി കൗശൽ കിഷോർ രം​ഗത്തെത്തി. കുറ്റവാളികൾ ശിക്ഷിക്കപ്പെടുമെന്ന് മന്ത്രി പറഞ്ഞു.

കൊല്ലപ്പെട്ടത് മകൻ്റെ ഉറ്റ സുഹൃത്താണ്. സംഭവ സമയത്ത് മകൻ സ്ഥലത്ത് ഇല്ലായിരുന്നു. പൊലീസ് കണ്ടെത്തിയത് മകൻ്റെ പേരിലുള്ള തോക്കാണ്. സംഭവത്തിൽ മൂന്ന് പേർ കസ്റ്റഡിയിലുണ്ടെന്നും പൊലീസ് അറിയിച്ചു.