കേരള കോണ്‍ഗ്രസ് (എം) യുഡിഎഫ് മുന്നണിയിലേക്ക് തിരിച്ചുവരണം: കെ മുരളീധരന്‍,

കോട്ടയം: ഇടത് മുന്നണിയിലേക്ക് പോയ കേരള കോണ്‍ഗ്രസ് (എം) യുഡിഎഫ് മുന്നണിയിലേക്ക് തിരിച്ചുവരണമെന്ന് കോണ്‍ഗ്രസ് നേതാവ് കെ മുരളീധരൻ.

പാര്‍ലമെന്റ് തിരഞ്ഞെടുപ്പിന് ശേഷം അക്കാര്യത്തില്‍ തീരുമാനം ഉണ്ടാകുമെന്ന് അദ്ദേഹം പറഞ്ഞു. ആരുടെയും കുറ്റംകൊണ്ടല്ല കേരള കോണ്‍ഗ്രസ് മുന്നണി വിട്ടത്. വിട്ടുപോയ എല്ലാ പാര്‍ട്ടികളും തിരിച്ചുവരണമെന്നാണ് ആഗ്രഹിക്കുന്നതെന്നും മുരളീധരൻ വ്യക്തമാക്കി.

പുതുപ്പള്ളിയിലെ കോണ്‍ഗ്രസിന്റെ താരപ്രചാരക പട്ടികയില്‍ ഉള്‍പ്പെടാത്തതില്‍ പരിഭവമില്ല. പാര്‍ട്ടിക്ക് അവമതിപ്പ് ഉണ്ടാക്കുന്ന ഒന്നും കോണ്‍ഗ്രസ് നേതാക്കളുടെ ഭാഗത്ത് നിന്നുണ്ടാകില്ലെന്നും കെ കരുണാകരൻ സ്മാരകത്തിന്റെ പ്രവര്‍ത്തനവുമായി ബന്ധപ്പെട്ടുള്ള കാര്യങ്ങളാണ് ആറാം തീയതി പറയാമെന്നാണ് പറഞ്ഞതെന്നും അദ്ദേഹം അറിയിച്ചു.