സ്ത്രീകളെ തുറിച്ചുനോക്കിയെന്ന് ആരോപണം; ഹോട്ടലിനു മുന്നില്‍ കൂട്ടത്തല്ല്

തിരുവല്ല: പത്തനംതിട്ട തിരുവല്ല രാമൻചിറയില്‍ ഹോട്ടലിനു മുന്നില്‍ കൂട്ടത്തല്ല്. സംഭവത്തിലെ പ്രതികള്‍ക്കായി പൊലീസ് അന്വേഷണം നടത്തിവരികയാണ്.

വ്യാഴാഴ്ച്ച രാത്രിയിലാണ് സംഭവം. ഭക്ഷണം കഴിക്കാനെത്തിയ സ്ത്രീകളെ ഹോട്ടലില്‍ എത്തിയ മൂന്നുപേര്‍ തുറിച്ചു നോക്കി എന്ന് ആരോപിച്ചാണ് സംഘര്‍ഷം ഉണ്ടായത്. 

ഭക്ഷണം കഴിക്കാനായി സ്ത്രീകളുള്‍പ്പെടെ ആറംഗ സംഘം എത്തുകയായിരുന്നു. ഇക്കൂട്ടത്തിലെ സ്ത്രീകളെ മറ്റൊരു കൂട്ടത്തിലെ പുരുഷൻമാര്‍ തുറിച്ചുനോക്കിയെന്ന് പറഞ്ഞ് വാക്കുതര്‍ക്കമുണ്ടാവുകയായിരുന്നു. ഇത് സംഘര്‍ഷത്തില്‍ കലാശിക്കുകയും ചെയ്തു. 

എന്നാല്‍ സംഘര്‍ഷം ഉണ്ടായ ഇരുവിഭാഗത്തിലുള്ളവരും ക്രിമിനല്‍ കേസുകളിലെ പ്രതികളാണെന്നാണ് പുറത്തുവരുന്ന വിവരം. സിസിടിവി ദൃശ്യങ്ങള്‍ പുറത്തുവന്നതിന് പിന്നാലെ പൊലീസ് കേസെടുത്ത് അന്വേഷണം തുടങ്ങിയിട്ടുണ്ട്. സംഭവത്തില്‍ പ്രതികളെ ഇതുവരെ പിടികൂടിയിട്ടില്ല. അതേസമയം, സംഘര്‍ഷത്തില്‍ പരിക്കേറ്റ ഒരാളെ തിരുവല്ലയിലെ സ്വകാര്യ ആശുപത്രിയില്‍ പ്രവേശിപ്പിച്ചു.