ഹിന്ദു സമൂഹത്തിന്റെ വിശ്വാസങ്ങളെ അധിക്ഷേപിച്ച സ്പീക്കർ ഷംസീർ പ്രസ്താവന പിൻവലിച്ച് പരസ്യമായി മാപ്പു പറയാൻ തയ്യാറാവണം എം.ടി.രമേശ്.

തൊടുപുഴ:ഹിന്ദു സമൂഹത്തിന്റെ വിശ്വാസങ്ങളെ അധിക്ഷേപിച്ച സ്പീക്കർ ഷംസീർ പ്രസ്താവന പിൻവലിച്ച് പരസ്യമായി മാപ്പു പറയാൻ തയ്യാറാവണമെന്ന് ബിജെപി സംസ്ഥാന ജനറൽ സെക്രട്ടറി എം.ടി.രമേശ് പറഞ്ഞു.

വിശ്വാസ സംരക്ഷണ ദിനത്തിന്റെ ഭാഗമായി തൊടുപുഴയിൽ പുതുക്കുളം നാഗരാജാ ക്ഷേത്രത്തിലെ ഗണപതി വിഗ്രഹത്തിൽ പുഷ്പാർച്ചന നടത്തിയ ശേഷം പത്രക്കാരോട് സംസാരിക്കുകയായിരുന്നു അദ്ദേഹം.

ഹിന്ദു സമൂഹത്തിന്റെ വിശ്വാസങ്ങളെയും അവരുടെ ചിന്തകളെയും എല്ലാം എന്തു ചെയ്താലും ഒരു കുഴപ്പവുമില്ല എന്ന അഹങ്കാരവും,ധാർഷ്ട്യവുമാണ് സിപിഎമ്മിന് എന്നതിന്റെ തെളിവാണ് സ്പീക്കർ ഷംസീറിന്റെ ഗണപതിയെ അവഹേളിച്ചു കൊണ്ടുള്ള പ്രസ്താവനയിൽ കൂടി പുറത്തു വന്നിരിക്കുന്നത്.

ഹിന്ദു  സമൂഹത്തിന്റെ വിശ്വാസങ്ങളുടെ മേൽ കുതിര കയറിയാൽ ആരും ചോദിക്കാനും,പറയാനും ഉണ്ടാവില്ലെന്ന  ധിക്കാരവും,ധാർഷ്ട്യവും ഇനിയെങ്കിലും അവസാനിപ്പിക്കാൻ സിപിഎം തയ്യാറാവണം.എന്തിനാണ് ഒരു സമൂഹത്തിന്റെ ബോധപൂർവമായിട്ടുള്ള വിശ്വാസങ്ങളെ സിപിഎം ഇങ്ങനെ അധിക്ഷേപിക്കുന്നത്.

ഇത് ആദ്യമായിട്ടല്ല സിപിഎം ഇങ്ങനെ ചെയ്യുന്നത്.നേരത്തേ ശബരിമല പ്രക്ഷോഭ സമയത്ത് ശബരിമല അയ്യപ്പനെ തെരുവിൽ വലിച്ചിഴയ്ക്കാൻ തയ്യാറായിട്ടുള്ള പാർട്ടിയാണ് സിപിഎം.സമാനമായിട്ടുള്ള നിലപാടാണ് ഈ കാര്യത്തിലും സിപിഎം സ്വീകരിച്ചിട്ടുള്ളത്.

സ്പീക്കർ കേരളത്തിന്റെ നിയമസഭയുടെ നാഥനായിട്ടുള്ള വ്യക്തിയാണ്.

അദ്ദേഹത്തിന്റെ പ്രസ്താവന കേരളത്തിലെ മഹാഭൂരിപക്ഷം വരുന്ന ഹിന്ദു സമൂഹത്തിന്റെ വിശ്വാസങ്ങളെ പരസ്യമായി വെല്ലുവിളിക്കുന്നതിന് തുല്യമാണ്.ആ വിശ്വാസത്തെ യുക്തിയുമായി ബന്ധിപ്പിക്കേണ്ട കാര്യമില്ല.

കോടിക്കണക്കിന് വിശ്വാസികളുടെ മനസ്സിൽ ഭക്തിയോടെ ആഴത്തിൽ പതിഞ്ഞിട്ടുള്ള ഒരു സങ്കൽപം ആണ് ഗണപതിയുടെ സങ്കല്പം.ആ സങ്കല്പത്തെ എന്തിനാണ് സ്പീക്കറെ പോലെ ഉന്നത സ്ഥാനത്തിരിക്കുന്ന ഒരാൾ പരസ്യമായി അധിക്ഷേപിക്കുന്നത്.അത് ബോധപൂർവമാണ്.

ആക്‌സ്മികമായി ഉണ്ടായിട്ടുള്ള കാര്യമല്ല.ബോധപൂർവമായി ഒരു സമൂഹത്തിന്റെ വിശ്വാസങ്ങളെ  അധിക്ഷേപിക്കുവാൻ തയ്യാറാവുക എന്നിട്ട് അതിനെ പരസ്യമായി ന്യായീകരിക്കുക സിപിഎമ്മിനെ പോലത്തെ പാർട്ടി അതിന് പിന്തുണ കൊടുക്കുക ഇതൊന്നും അംഗീകരിച്ചു കൊടുക്കാൻ സാധിക്കുകയില്ല.

അതുകൊണ്ട് സ്പീക്കർ ഈ കാര്യത്തിൽ അദ്ദേഹത്തിന്റെ പ്രസ്താവന പിൻവലിച്ച് പരസ്യമായി മാപ്പു പറയാൻ തയ്യാറാവണം.സ്‌പീക്കറുടെ നിലപാടിനെ തള്ളിപ്പറയാൻ സിപിഎമ്മും തയ്യാറാവണം.അല്ലാതെ ഈ പ്രശനം അവസാനിക്കാൻ പോകുന്നില്ല.

ഇത്തരം അധിക്ഷേപകരമായിട്ടുള്ള പരാമർശങ്ങളെ കേരളത്തിലെ വിശ്വാസി സമൂഹം ഒരിയ്ക്കലും അംഗീകരിക്കാൻ തയ്യാറല്ല എന്ന് സിപിഎം മനസ്സിലാക്കണം അദ്ദേഹം പറഞ്ഞു.തുടർന്ന് അദ്ദേഹം ഈയിടെ അന്തരിച്ച ബ്രാഹ്മിൻസ് ഫുഡ് പ്രോഡക്ടസ് സ്ഥാപകൻ വിഷ്‌ണു നമ്പൂതിരിയുടെ വീടും സന്ദർശിച്ചു.

പുതുക്കുളം നാഗാരാജ ക്ഷേത്രത്തിലെ ഗണപതി വിഗ്രഹത്തിൽ നടന്ന പുഷ്പാർച്ചനയിൽ ബിജെപി ഇടുക്കി ജില്ലാ പ്രസിഡന്റ് കെ.എസ്.അജി,ജില്ലാ മീഡിയ സെൽ കൺവീനർ സനൽ പുരുഷോത്തമൻ,തൊടുപുഴ മണ്ഡലം സെക്രട്ടറി രമേശ് ബാബു,പദ്മകുമാർ മണക്കാട് എന്നിവർ പങ്കെടുത്തു.