പ്രതിപക്ഷ സഖ്യം 'ഇന്ത്യ' എന്ന പേര് ഉപയോഗിക്കുന്നത് തടയണമെന്ന ഹർജി സുപ്രീം കോടതി തള്ളി

ന്യൂഡല്‍ഹി: പ്രതിപക്ഷ പാര്‍ട്ടികളുടെ സഖ്യത്തിന് 'ഇന്ത്യ' എന്ന പേര് ഉപയോഗിക്കുന്നത് തടയണമെന്നാവശ്യപ്പെട്ടു സമര്‍പ്പിച്ച പൊതുതാത്പര്യ ഹര്‍ജി സുപ്രീംകോടതി തള്ളി.

ജനശ്രദ്ധ ലക്ഷ്യമിട്ടുള്ളതെന്നു പറഞ്ഞ് ജസ്റ്റീസുമാരായ സഞ്ജയ് കിഷൻ കൗള്‍, സുധാൻഷു ധൂലിയ എന്നിവരടങ്ങിയ ബെഞ്ച് ഹര്‍ജി പരിഗണിക്കാൻ വിസമ്മതിക്കുകയായിരുന്നു. ഇതേത്തുടര്‍ന്ന് പരാതിക്കാരനായ രോഹിത് ഖേരിവാള്‍ ഹര്‍ജി പിൻവലിച്ചു. 

'ഇന്ത്യ' എന്ന ചുരുക്കെഴുത്ത് ഉപയോഗിക്കുന്നതു തടയണമെന്നാവശ്യപ്പെട്ടുള്ള ഹര്‍ജിയില്‍ കഴിഞ്ഞ നാലിന് ഡല്‍ഹി ഹൈക്കോടതി 26 പ്രതിപക്ഷ പാര്‍ട്ടികള്‍ക്കും തെരഞ്ഞെടുപ്പ് കമ്മീഷനും നോട്ടീസ് അയച്ചിരുന്നു. ഇതിനു പിന്നാലെയാണ് സമാനമായ ഹര്‍ജി സുപ്രീംകോടതി തള്ളിയത്.