വ്യാജ ഡിഗ്രി കേസ് അന്വേഷണം നീളുന്നത് വൻ തട്ടിപ്പ് സംഘത്തിലേക്ക്.

ആലപ്പുഴ:എസ്എഫ്ഐ നേതാവ് നിഖിൽ തോമസ് ഉൾപ്പെട്ട വ്യാജ ഡിഗ്രി കേസ് അന്വേഷണം നീളുന്നത് വൻ തട്ടിപ്പ് സംഘത്തിലേക്ക്.

കേസിലെ മറ്റൊരു പ്രതിയായ ക​ണ്ട​ല്ലൂ​ർ സ്വ​ദേ​ശി അബിൻ സി രാജ് കൂടുതൽ വ്യാജ ഡിഗ്രി സർട്ടിഫിക്കറ്റ് നിർമിച്ച് മറ്റ് പലർക്കും നൽകിയതായാണ് അന്വേഷണത്തിൽ വ്യക്തമാകുന്നതെന്ന് പോലീസ്.

നിഖിൽ തോമസ് പിടിയിലായതോടെയാണ് ഇതുസംബന്ധിച്ച കൂടുതൽ വിവരങ്ങൾ അന്വേഷണസംഘത്തിന് ലഭിച്ചതെന്ന് മുഖ്യധാരമാധ്യമങ്ങൾ റിപ്പോർട്ട് ചെയ്യുന്നു.

കാ​യം​കു​ള​ത്തുള്ള നി​ര​വ​ധി​പേ​ർ​ക്ക് അ​ബി​ൻ രാ​ജ്​ ക​ലിം​ഗ സ​ർ​വ​ക​ലാ​ശാ​ല​യു​ടെ വ്യാ​ജ സ​ർ​ട്ടി​ഫി​ക്ക​റ്റു​ക​ൾ ത​യാ​റാ​ക്കി ന​ൽ​കി​യ​താ​യാ​ണ് വിവരം. ഇത്തരത്തിൽ സർട്ടിഫിക്കറ്റ് തയ്യാറാക്കി നൽകിയതിന് ര​ണ്ടു​ല​ക്ഷം രൂ​പ​യാ​ണ് നി​ഖി​ലി​ൽ​നി​ന്ന്​ അ​ബി​ൻ വാ​ങ്ങി​യ​ത്.

നിഖിൽ പണം അ​ബി​ന്റെ അമ്മയുടെ ബാങ്ക് അ​ക്കൗ​ണ്ടി​ലേക്കാണ് അയച്ചതെന്ന് അന്വേഷണസംഘം കണ്ടെത്തിയിട്ടുണ്ട്. എ​റ​ണാ​കു​ള​ത്തു​ള്ള ഏ​ജ​ൻ​സി​യാ​ണ് ഇത്തരത്തിൽ വ്യാജ സർട്ടിഫിക്കറ്റുകൾ തയ്യാറാക്കി നൽകാൻ ഇടനിലയായി പ്രവർത്തിച്ചതെന്ന വിവരവും പൊലീസിന് ലഭിച്ചിട്ടുണ്ട്. 65000 രൂ​പ​യാ​ണ് ഇ​വ​ർ​ക്ക് ന​ൽ​കി​യി​രു​ന്ന​ത്. അ​ബി​നു​മാ​യി സൗ​ഹൃ​ദ​മു​ണ്ടാ​യി​രു​ന്ന ചി​റ​ക്ക​ട​വ​ത്തു​ള്ള ചി​ല​രും സ​ർ​ട്ടി​ഫി​ക്ക​റ്റ് സ്വ​ന്ത​മാ​ക്കി​യ​തായി സൂചനയുണ്ട്.

തിരുവനന്തപുരത്തും അബിൻ വ്യാജ ബിരുദ സർട്ടിഫിക്കറ്റുകൾ തയ്യാറാക്കി നൽകിയതായി വിവരമുണ്ട്. യൂണി​വേ​ഴ്സി​റ്റി പ​ഠ​ന കാ​ല​യ​ള​വി​ലാ​ണ് അ​ബി​ൻ വ്യാ​ജ സ​ർ​ട്ടി​ഫി​ക്ക​റ്റ് മാ​ഫി​യ​യു​ടെ ഭാ​ഗ​മാ​കു​ന്ന​ത്. പി.​എ​സ്.​സി പ​രീ​ക്ഷ ത​ട്ടി​പ്പ് കേ​സി​ലെ പ്ര​തി​ക​ളാ​യ ശി​വ​ര​ഞ്ജി​ത്തും ന​സീ​മു​മാ​യി​രു​ന്നു അ​ന്ന​ത്തെ സം​ഘ​ട​ന സ​ഹ​പ്ര​വ​ർ​ത്ത​ക​രെന്നും മാധ്യമങ്ങൾ റിപ്പോർട്ട് ചെയ്യുന്നു.

ഇപ്പോൾ മാലിയിലുള്ള അബിൻ രാജിനെ നാട്ടിലെത്തിക്കാനുള്ള നീക്കം പൊലീസ് ആരംഭിച്ചിട്ടുണ്ട്. അതേസമയം അന്വേഷണം നിഖിലിന്‍റെ സർട്ടിഫിക്കറ്റിൽ ഒതുക്കുമെന്നും സൂചനയുള്ളതായി പ്രതിപക്ഷ സംഘടനകൾ ആരോപിക്കുന്നു. അബിൻ പഠിച്ചിരുന്ന കാലത്തെ ബന്ധങ്ങൾ അന്വേഷിക്കുന്നത് എസ്എഫ്ഐയെ കൂടുതൽ പ്രതിരോധത്തിലാക്കുമെന്നാണ് വിലയിരുത്തൽ.

അതേസമയം നിഖിൽ തോമസിനെ ഇന്ന് തെളിവെടുപ്പിനായി കൊണ്ടുപോകും. ഒളിവിൽ പോകുന്നതിന് മുമ്പ് മൊബൈൽ ഫോൺ കായംകുളം കരിപ്പുഴ തോട്ടിൽ ഉപേക്ഷിച്ചെന്നാണ് നിഖിൽ പോലീസിന് നൽകിയ മൊഴി.വ്യാജ ബിരുദ സർട്ടിഫിക്കറ്റ് ചമച്ച കേസിൽ നിഖിൽ തോമസിനെ ശനിയാഴ്ച കായംകുളം പോലീസ് അറസ്റ്റ് ചെയ്തിരുന്നു.

അഞ്ച് ദിവസമായി ഒളിവിലായിരുന്ന നിഖിലിനെ പുലർച്ചെ കോഴിക്കോട്ടു നിന്ന് കൊട്ടാരക്കരയിലേക്ക് വരുന്നതിനിടെ കോട്ടയത്ത് വെച്ച് കെ.എസ്.ആർ.ടി.സി. ബസിൽ നിന്നാണ് പോലീസ് കസ്റ്റഡിയിലെടുത്തത്. കോടതിയിൽ ഹാജരാക്കിയ ഇയാളെ ജൂൺ 30 വരെ പോലീസ് കസ്റ്റഡിയിൽ വിട്ടു.